ატმოსფერული ტემპერატურის მატებასთან ერთად, 2009 წელს დაგეგმილი გზების რეაბილიტაციის პროექტების განხორციელება დაიწყო. გზებზე ასფალტბეტონის საფარის გაუმჯობესების სამუშაოები უახლოეს დღეებში ყველა რეგიონში განახლდება.
აღნიშნული სამუშაოები უკვე დაიწყო მარნეული-თეთრიწყაროს საავტომობილო გზის 7,7 კმ-იან მონაკვეთზე.
დღეს, 12 მარტს 13:00 სთ-ზე საქართველოს რეგიონული განვითარებისა და ინფრასტრუქტურის მინისტრი დავით ტყეშელაშვილი და საქართველოს საავტომობილო გზების დეპარტამენტის თავმჯდომარე რამაზ ნიკოლაიშვილი მარნეული-თეთრიწყაროს საავტომობილო გზაზე მიმდინარე სარეაბილიტაციო სამუშაოებს ადგილზე გაუწევენ მონიტორინგს.
მარნეული-თეთრიწყაროს საავტომობილო გზის სარეაბილიტაციო სამუშაოები 2009 წლის ზაფხულში დასრულდება (საერთო ღირებულება 2 მლნ. 812 ათასი ლარი). აღნიშნული გზის მშენებლობაზე 100-ზე მეტი საქართველოს მოქალაქეა დასაქმებული.
გზის სარეაბილიტაციო სამუშაოებს ასრულებს ქართული კომპანია - შ.პ.ს ,,გზისმშენებელი-11’’.
აღნიშნულ მიმართულებაზე საგზაო ქსელის რეაბილიტაცია, ხელს შეუწყობს ორ მთავარ რაიონულ ცენტრს შორის (მარნეული-თეთრიწყარო) ავტოტრანსპორტის უფრო კომფორტულ გადაადგილებასა და მოსახლეობის სოციალური მდგომარეობის გაუმჯობესებას.