საქართველოს საავტომობილო გზების დეპარტამენტის თავმჯდომარემ რამაზ ნიკოლაიშვილმა დეპარტამენტის საკონფერენციო დარბაზში გამართა საინფორმაციო ხასიათის ბრიფინგი.

ბრიფინგის თემა იყო: რიკოთის საუღელტეხილო გვირაბში, ქართველი, გერმანელი და ავსტრიელი სპეციალისტების, მიმდინარე წელს დაგეგმილი სარეაბილიტაციო სამუშაოების პროექტირებისათვის საჭირო კვლევებს ერთობლივად განახორციელებენ.  კვლევით სამუშაოებთან დაკავშირებით, 18 მაისიდან 22 მაისის ჩათვლით, დილის 8:00 საათიდან-საღამოს 20:00 საათამდე თბილისი-სენაკი-ლესელიძის ს/გზის 142 კმ-ზე შეჩერდება ავტოტრანსპორტის მოძრაობა. აღნიშნულ პერიოდში ავტოტრანსპორტის მოძრაობა გადართული იქნება გვირაბის შემოვლით გზაზე.

დეპარტამენტის თავმჯდომარემ საზოგადოებას გააცნო რიკოთის გვირაბში ჩასატარებელი სარეაბილიტაციო სამუშაოების შესახებ ინფორმაციას.
 
გვირაბის სარეაბილიტაციო სამუშაოები ითვალისწინებს :
 
• გვირაბის სამაგრისა და ჰიდროიზოლაციის სისტემის რეაბილიტაციას (შეცვლას) უახლესი ტენოლოგიების გამოყენებით;
• ევროსტანდარტების შესაბამისად, ხანძარსაწინააღმდეგო, სავენტილაციო, განათებისა და ელექტროუზრუნველყოფის სისტემების მოდერნიზებას, რაც ეფექტური იქნება როგორც კომფორტულობის, ასევე, ეკონომიურობის თვალსაზრისითაც.   საკანალიზაციო სისტემის განახლებას;
• ვიდეოკამერების დამონტაჟებას სადღეღამისო მონიტორინგის რეჟიმით;
• გვირაბში მოძრაობის ორგანიზებისა და უსაფრთხოების ღონისძიებების ევროპული სტანდარტების შესაბამისად უზრუნველყოფას.
 
გვირაბში სარეაბილიტაციო სამუშაოები მიმდინარე წლის ზაფხულში დაიწყება. საპროექტო სამუშაოებს ასრულებენ გერმანელი და ავსტრიელი სპეციალისტები.