საქართველოს რეგიონული განვითარებისა და ინფრასტრუქტურის მინისტრი დავით ტყეშელაშვილი და საქართველოს საავტომობილო გზების დეპარტამენტის თავმჯდომარე რამაზ ნიკოლაიშვილი შიდასახელმწიფოებრივი მნიშვნელობის ზაჰესი-მცხეთა-კავთისხევი-გორის საავტომობილო გზის 14,3 კმ-იანი მონაკვეთის სარეაბილიტაციო სამუშაოების მიმდინარეობას დაათვალიერებს.

აღნიშნულ მონაკვეთზე, გზის სარეაბილიტაციო სამუშაოები ითვალისწინებს გზის საფუძვლის მოწყობას რეციკლირების მეთოდით და ახალი ასფალტო-ბეტონის საფარის დაგებას (ორი ფენა). ასევე, ხელოვნური ნაგებობების აღდგენას, გაბიონების, სანიაღვრე სისტემისა და საგზაო ნიშნების მოწყობას. სარეაბილიტაციო სამუშაოების ღირებულება მსოფლიო ბანკის დაფინანსებით შეადგენს 2 მლნ. 864 ათას ლარს. სარეაბილიტაციო სამუშაოებს ასრულებს შ.პ.ს. ,,დ და გ ტექლოლოგი”.

აღნიშნულ მიმართულებაზე საგზაო ქსელის რეაბილიტაცია, ხელს შეუწყობს გზის გამტარუნარიანობის გაზრდასა და დასახლებულ პუნქტებს შორის ავტოტრანსპორტის კომფორტულ გადაადგილებას. ასევე, მოსახლეობის სოციალური მდგომარეობის გაუმჯობესებას.

აღსანიშნავია, რომ 2009-2010 წლებში საქართველოს საავტომობილო გზების დეპარტამენტი მსოფლიო ბანკის დაფინანსებით, სარეაბილიტაციო სამუშაოებს განახორციელებს შიდასახელმწიფოებრივი და ადგილობრივი მნიშვნელობის 550 კმ გზაზე, სადაც გამოყენებული იქნება საგზაო მშენებლობის მსოფლიოში აპრობირებული სხვადასხვა ტექნოლოგიები.