საქართველოს რეგიონული განვითარებისა და ინფრასტრუქტურის სამინისტროს, საავტომობილო გზების დეპარტამენტის ინფორმაციით, სტიქიის, კერძოდ უხვი ნალექისა და მეწყრის გამო ფშაველი-აბანო-ომალოსა და ჟინვალი-ბარისახო-შატილის გზებზე მოძრაობა შეზღუდულია. ორივე მიმართულებაზე მობილიზებულია შესაბამისი ტექნიკა, ადგილზე იმყოფებიან საავტომობილო გზების დეპარტამენტისა და კონტრატქორი ორგანიზაციების წარმომადგენლები.
უხვი ნალექების შედეგად, შიდასახელმწიფოებრივი მნიშვნელობის ფშაველი–აბანო–ომალოს საავტომობილო გზის მე-9 კმ-ზე, სოფელ ლეჩურთან გზის სავალი ნაწილი წყალმა წაიღო. რის გამოც, აღნიშნული საავტომობილო გზის კმ9-კმ72 მონაკვეთზე აკრძალულია ყველა სახის ავტოტრანსპორტის მოძრაობა. ხოლო აღნიშნული გზის კმ1-კმ9 მონაკვეთზე ავტოტრანსპორტის მოძრაობა თავისუფალია. სოფელ ლეჩურთან წყლის დონის დაკლებისთანავე დაიწყება საპროექტო სამუშაოები რათა სტიქიის სალიკვიდაციო სამუშაოების პარალელურად განხორციელდეს საპრევენციო ღონისძიებები.
ჟინვალი-ბარისახო-შატილის საავტომობილო გზის 59-ე კმ-ზე ჩამოვიდა დიდი ოდენობით მეწყრული მასა. ჩამოსული მასის გაწმენდითი სამუშაოები უკვე დაწყებულია და საავტომობილო მოძრაობა ხვალ დღის განმავლობაში აღდგება.