რიკოთის საუღელტეხილო გზის, უბისა-შორაპანის მონაკვეთის მშენებლობაზე საერთაშორისო ტენდერში გამარჯვებულ კომპანიასთან ხელშეკრულება გაფორმდა. ახალ გზას ჩინური კომპანია „China Road and Bridge Corporation“ ააშენებს. 13 კმ-იანი ახალი გზის მსენებლობის ხელშეკრულებას ხელი მოაწერეს საქართველოს რეგიონული განვითარებისა და ინფრატსრუქტურის მინიტრის პირველმა მოადგილემ, საავტომობილო გზების დეპარტამენტის თავმჯდომარემ ირაკლი ქარსელაძემ და კომპანია „China Road and Bridge Corporation“-ის თავმჯდომარემ ლუ შანმა.

კომპანია „China Road and Bridge Corporation“ 1979 წელს დაფუძნდა. კომპანიამ ბოლო 10 წელიწადში ააშენა 200-ზე მეტი გზა, რომელთა ჯამური სიგრძე 10 000 კმ-ზე მეტია; 100-კმ-ზე მეტი სიგრძის მქონე 40 მასშტაბური და რთული კონსტრუქციის ხიდი; 6 დიდი და რთული კონსტრუქციის გვირაბი, რომელთა ჯამური სიგრძე 30 კმ-ს აღემატება.

უბისა-შორაპანის მონაკვეთზე ცემენტ-ბეტონის 4 ზოლიანი 13 კმ-იანი გზა,  27  ხიდი და 18 გვირაბი აშენდება. სამშენებლო სამუშაოებს ევროპის საინვესტიციო ბანკი აფინანსებს.

საქართველოსთვის პრიორიტეტს წარმოადგენს სატრანსპორტო კორიდორების გაუმჯობესების გზით სატრანზიტო მიმართულებით კონკურენტუნარიანობის გაზრდა. ასევე, ქვეყნის ეკონომიკური გაძლიერების მიზნით, დიდი მნიშვნელობა ენიჭება მეზობელ ქვეყნებთან ვაჭრობის ხელშეწყობასა და ტურისტული ინფრასტრუქტურის განვითარებას. აღნიშნულის გათვალისწინებით, განსაკუთრებულ ფუნქციას იძენს E-60 და E-70 სატრანზიტო კორიდორების ოთხზოლიანი (აღმოსავლეთ დასავლეთის ჩქაროსნული) მაგისტრალების მოდერნიზაცია, შესაბამისად, აქტიურად მიმდინარეობს სხვადასხვა სეგმენტების მშენებლობა-რეკონსტრუქცია-მოდერნიზაცია. უბისა-შორაპანის მონაკვეთი კი აღმოსავლეთ-დასავლეთის E-60 საავტომობილო- სატრანზიტო კორიდორის შემადგენელ ერთ-ერთ სეგმენტს წარმოადგენს.

რიკოთის უღელტეხილზე დაგეგმილია სულ 51.6 კმ-მდე სიგრძის გზის მშენებლობა, რომელიც 96 ხიდსა და 53 გვირაბს მოიცავს. ჩუმათელეთი-არგვეთას მონაკვეთი E 60 ავტომაგისტრალის შემადგენელი ნაწილია და ერთ-ერთი ურთულესი მონაკვეთია.

უბისა-შორაპანის პროექტის სახელშეკრულებო ღირებულება  901 973 206.57 ლარია. პროექტის განხორციელების ვადა 2018 წლის დეკემბრიდან 2021 წლის დეკემბრამდეა განსაზღვრული.