საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტი ახალქალაქი-ნოსტე-მთიულთუბნის საავტომობილო გზის 5.7 კილომეტრიანი მონაკვეთის რეაბილიტაციას ვადაზე ადრე დაასრულებს.
პროექტი მოიცავს: გზის სავალ ნაწილზე ასფალტ-ბეტონის საფარის მოწყობას; წყალგამტარი მილების, გზის საყრდენი კედლების, გვერდულების, კიუვეტების, გაბიონების, საგზაო ნიშნების მოწყობასა და გზის ჰორიზონტალური მონიშვნის სამუშაოებს.
ამ დროისათვის, სარეაბილიტაციო მონაკვეთზე ასფალტ-ბეტონის საფარი უკვე დაგებულია. მიმდინარეობს საზოგადოებრივი ტრანსპორტის გაჩერებების მოწყობისა და ბოლო ეტაპის სხვა სამუშაოები.
აღნიშნული გზა, რომელზეც ასფალტის საფარი არასდროს ყოფილა, ერთმანეთთან და ცენტრალურ მაგისტრალთან 4 სოფელს ( ახალქალაქი, ახალციხე, ნოსტე და მთიულთუბანი ) აკავშირებს. სწორედ ამ მაღალი სოციალური მნიშვნელობიდან გამომდინარე, მის რეაბილიტაციას საავტომობილო გზების დეპარტამენტი ახორციელებს.
საგზაო სამუშაოები მსოფლიო ბანკის „შიდასახელმწიფოებრივი და ადგილობრივი გზების რეაბილიტაციის მესამე პროექტის (SLRP-III)” ფარგლებში ხორციელდება და მისი ღირებულება 3 მილიონ 46 ათას 700 ლარია.