საქართველოს რეგიონული განვივითარებისა და ინფრასტრუქტურის სამინისტროს საავტომობილო გზების დეპარტამენტი აგარა-ყორნისი-ცხინვალის საავტომობილო გზის 12 კილომეტრიანი მონაკვეთის რეაბილიტაციას ახორციელებს. მიმდინარე სამშენებლო სამუშაოებს ადგილზე საავტომობილო გზების დეპარტამენტის თავმჯდომარე ვაჟა ფანჩულიძე ადგილობრივი ხელისუფლების წარმომადგენლებთან ერთად გაეცნო.
ობიექტზე, ამ დროისთვის 2.5 კმ-ზე უკვე დაიგო ასფალტ-ბეტონის საფარი, ასევე მიმდინარეობს გაბიონების, წყალგამტარი მილების, კიუვეტებისა და ქვიშა-ხრეშოვანი საფუძვლის მოწყობა. რეაბილიტაციის პროექტის ფარგლებში კი მთლიან მონაკვეთზე დაგეგმილია ასფალტ-ბეტონის საფარის დაგება, საყრდენი კედლების, გვერდულების, წყალგამტარი მილების, ავტობუსის გაჩერებების და საგზაო ნიშნების მოწყობის სამუშაოები.
აღნიშნული გზა ერთმანეთთან 5-ზე მეტ სოფელს დააკავშირებს. პროექტის ღირებულება 5 მილიონ 194 ათას ლარს შეადგენს და მსოფლიო ბანკის დაფინანსებით ხორციელდება. სარეაბილიტაციო სამუშაოები, რომელიც ცოტა ხნის წინ დაიწყო, მიმდინარე წლის ბოლომდე დასრულდება. ობიექტზე 90 ადამიანია დასაქმებული.